Onorevoli Julia Farrugia Portelli, Ministru għall-Inklużjoni, il-Volontarjat u d-Drittijiet tal-Konsumatur
Sur Oliver Scicluna, Kap Eżekuttiv tal-Aġenzija Sapport,
Sinjura Samantha Pace Gasan, Kummissarju għad-drittijiet tal-Persuni b’Diżabilità,
Mistednin Distinti,
Nirringrazzjakom ta’ din l-istedina. Huwa ta’ pjaċir għalija u għal marti Miriam li qegħdin hawn flimkien magħkom niċċelebraw id-diversità propju fi tmiem il-ġimgħa ddedikata lill-persuni b’diżabilità.
It-tema tan-Nazzjonijiet Magħquda għal din is-sena kienet ‘soluzzjonijiet trasformattivi għal żvilupp inklussiv’. Il-Komunità Internazzjonali saħqet ukoll dwar l-importanza li nisħqu fuq r-rwol tal-innovazzjoni biex niżguraw aktar aċċessibilità u ekwità.
Nemmen li bl-adozzjoni ta’ oqfsa leġiżlattivi li jippromwovu l-ekwità fl-opportunitajiet soċjali, edukattivi, u fil-qasam tal-impjiegi, għandna ċ-ċans li nippromwovu soċjetà aktar ġusta għal kulħadd.
Dawn l-għodda insibuhom fuq kull livell. Kemm nazzjonali fl-Istrateġija Nazzjonali għad-Drittijiet ta’ Persuni b’Diżabilita, fuq livell Ewropew fid-dokument Unjoni tal-Ugwaljanza, kif ukoll dak internazzjonali fl-Istrateġija tan-Nazzjonijiet Magħquda għall-Inklużjoni tad-Diżabilità. Ma ninsewx ukoll l-Għanijiet ta’ Żvilupp Sostenibbli b’mod partikolari in-numru 8 dwar xogħol deċenti u tkabbir ekonomiku u n-numru 10 dwar it-tnaqqis tal-inugwaljanzi.
Napprezza ħafna li pajjiżna qed jimxi b’mod effettiv fuq dawn l-istrateġiji. Dawn huma intiżi biex jiġi rriformat is-settur tad-diżabilità b’tali mod li jkun ta’ benefiċċju kemm għall-persuni affettwati kif ukoll għall-familji tagħhom. Inrodd ħajr hawnhekk lill-Kummissjoni għad-drittijiet tal-Persuni b’Diżabilità u lill- Aġenzija Sapport tal-ħidma sfiqa tagħhom.
Filwaqt li tajjeb li jkollna qafas sod u miri ċari ta’ fejn nixtiequ naslu mill-lat leġislattiv, tajjeb li nżommu f’moħħna li f’pajjiż demokratiku kull qasam jaħdem f’katina. Kollha niddependu fuq xulxin għat-twettiq tal-istrateġiji fil-ħajja ta’ kuljum. Kull qasam qiegħed jagħti l-kontribuzzjoni tiegħu. L-iskejjel, il-postijiet tax-xogħol, il-faċilitajiet sportivi, postijiet ta’divertiment u rikreazzjoni u postijiet ta’ qima.
Insellem, għalhekk, lil dawk kollha li jaħdmu għal inklużjoni fl-aktar sens wiesgħa, għall-poplu tagħna. Hawn ma nistax ninsa, hekk kif tixhed is-serata tal-lum, is-sehem kbir u validu li jagħti l-qasam tal-volontarjat. Fil-qasam tad-diżabilità b’mod partikolari, is-settur tal-volontarjat jaħdem id f’id kemm mal-persuni b’diżabilità, mal-familjari tagħhom kif ukoll mal-entitajiet pubbliċi sabiex id-diżabilità ma tibqax xkiel.
Nirringrazzja lilkom kollha li f’dawn il-persuni taraw l-abbiltajiet.
Kull persuna ċkejkna jew anzjana, b’diżabilità li tidher jew moħbija, għandha d-dritt ta’ ħajja dinjituża u bl-iktar mod indipendenti possibbli. Ħadd ma hu għar-rimi f’pajjiżna. Kulħadd għandu kontribut x’jagħti. Nappella lill-poplu tagħna kollu li jżomm dan f’moħħu u f’qalbu kull meta jkollu x’jaqsam ma’ persuni b’diżabilità.
Il-Premju Soċjetà Ġusta huwa propju dan.
Ċelebrazzjoni tal-ħidma kbira, impenn u dedikazzjoni li qed twettqu fis-settur tad-diżabilità. Intom kollha, nominati u rebbieħa qed isservu ta’ mudell ta’ eċċellenza għas-setturi li tirrapreżentaw.
Irrid niżżik ħajr lill-Ministeru għall-Inklużjoni, il-Volontarjat u d-Drittijiet tal-Konsumatur li għal sena oħra għarfu l-importanza li jingħata apprezzament lil dawk kollha li b’xi mod jew ieħor jagħtu sehemhom f’dan il-qasam.
Inħeġġiġkom tkomplu b’din il-vokazzjoni li tkunu ta’ servizz għal dawn in-nies sabiex tassew iħossuhom parti integrali mis-soċjetà tagħna.
Grazzi.