Dott. Tanya Sammut u Dott. Monica Borg Galea ħadu l-ġurament tal-ħatra bħala maġistrati fil-Qrati Inferjuri ta’ Malta waqt ċerimonja li tmexxiet mill-Eċċellenza Tagħha Myriam Spiteri Debono, President ta’ Malta, fil-Palazz Presidenzjali, il-Belt.
Fi tmiem iċ-ċerimonja tal-ħatra, il-President Spiteri Debono ferħet liż-żewġ maġistrati l-ġodda li llum ingħaqdu mal-Bank tal-ġudikatura u għalhekk bdew jifformaw parti mill-Organu Ġudizzjarju, wieħed mit-tlett organi tal-Istat.
Waqt il-messaġġ qasir tagħha, il-President qalet kif huma ser ikollhom funzjoni importanti, biex isostnu s-saltna tad-dritt f’pajjiżna u għaldaqstant ħeġġithom biex jieħdu b’serjetà ż-żewġ ġurament li ħadu u partikolarment jixtarru l-ġurament marbut mal-kariga tagħhom, għaliex f’dak il-ġurament hemm delineati il-kwalitajiet li għandhom jirregolaw l-imġiba u l-aġir tagħhom.
Hija enfasizzat l-imparzjalità, li żżom lilhom oġġettivi, ’il fuq mill-partijiet, u wkoll ’il fuq minn influwenzi oħra u li jkunu responsabbli.
Fuq kollox sostniet li l-onestà, hija dejjem element importanti għaliex aħna l-bnedmin m’aħniex perfetti, u kull wieħed u waħda minna huwa suġġett għal żball, iżda saħqet illi hemm differenza bejn żball li jkun ġenwin u żball li jkun malinn.
Hija kkonkludiet billi tkellmet dwar l-importanza tal-preparament akkademiku, l-istudju, il-familjarità ma’ deċiżjonijiet preċedenti tal-Qrati u mal-opinjonijiet ta’ awturi, kif ukoll fuq id-dixxerniment li jwassal għas-sentenzi tagħkom, li jisħaq fuq il-fatt illi s-sistema ġuridiku tagħna, fl-aħħar mill-aħħar, huwa msejjes fuq il-kelma tal-liġi, dak li tgħid il-liġi, u l-applikazzjoni tagħha.
Għaċ-ċerimonja tal-ħatra kienu preżenti wkoll il-Prim Ministru Robert Abela, il-Ministru għall-Ġustizzja u r-Riforma tas-Settur tal-Kostruzzjoni Jonathan Attard, il-Prim Imħallef Mark Chetcuti u l-Aġent Avukat tal-Istat Dr Maurizio Cordina.