Għat-tielet sena konsekuttiva qed ningħaqad magħkom għal edizzjoni oħra tal-Premjijiet għas-Servizz Pubbliku.
Iċ-ċelebrazzjoni tal-illejla taħbat fl-istess perjodu li fih jiġi mfakkar il-Jum Dinji għas-Servizz Pubbliku tan-Nazzjonijiet Uniti, okkażjoni ddedikata biex tagħti ġieħ lill-valur, lid-dedikazzjoni u lill-kontribut tas-servizz pubbliku fil-ħajja tal-komunitajiet.
Hekk kif illum qed nagħtu ġieħ lill-kontribut eċċellenti tal-uffiċjali pubbliċi għas-servizz tagħhom lejn il-pubbliku, fil-komunitajiet tagħna, huwa essenzjali wkoll li napprezzaw il-ħidma kontinwa li qed issir sabiex dan is-servizz ikompli jissaħħaħ, jiġġedded u jwieġeb aħjar għar-realtajiet tal-lum.
Din il-ħidma hija ta’ importanza kbira meta wieħed jikkonsidra kemm huma meħtieġa dawn is-servizzi għall-pubbliku, u kemm il-kwalità tagħhom tħalli impatt dirett fuq il-ħajja taċ-ċittadini.
Is-servizz pubbliku mhuwiex statiku.
Matul is-snin, dan evolva f’organizzazzjoni ħajja u dinamika, li kapaċi tadatta ruħha għall-bidliet tas-soċjetà u għall-ħtiġijiet dejjem jinbidlu tal-poplu.
Huwa servizz li jiġġedded sena wara sena permezz tas-sinerġija bejn l-impjegati tiegħu u n-nies li jaqdi.
Din is-sinerġija trid tkompli tissaħaħ u tiżdied u tintensifika ruħha meta s-servizzi mogħtija qegħdin jiżdiedu, isiru aktar speċjalizzati u ffukati fuq il-bżonnijiet tal-klijenti li jaċċessawhom, f’soċjetà li qed issir dejjem aktar esiġenti u interkonnessa.
Is-sostenibbiltà u l-ekwità fit-tfassil tas-servizzi liċ-ċittadini jagħmlu lis-servizz pubbliku wieħed mill-pilastri essenzjali ta’ stat demokratiku modern.
Is-servizz pubbliku huwa l-istruttura li tiżgura li l-istituzzjonijiet jaħdmu b’serjetà, b’kontinwità u b’responsabbiltà lejn il-poplu.
F’dinja li qed tinbidel kontinwament — bi sfidi ekonomiċi, teknoloġiċi, soċjali u ambjentali dejjem ġodda — il-ħidma tagħkom hija kruċjali sabiex il-pajjiż jibqa’ miexi ’l quddiem b’stabbiltà u fiduċja.
Is-servizz li jagħti kull wieħed u waħda minnkom jista’ jitqies bħala missjoni li tħaddan kull qasam tas-soċjetà tagħna: miż-żamma tal-ordni fil-pajjiż, għall-għoti tal-kura u l-għajnuna fis-settur tas-saħħa, milll-edukazzjoni li tingħata lill-uliedna wara l-bankijiet tal-iskola, sas-sotenn kontinwu ippermjat fuq il-bżonnijiet tal-persuni, f’kull età, f’kull stadju u perjodi ta’ ħajjithom, b’mod individwali, fiċ-ċelloli familjali, fil-kolletività tgal-ibliet u tal-irħula.
Fl-intervent tiegħi tas-sena l-oħra tkellimt dwar l-importanza taż-żamma tal-kontinwità ta’ din il-vokazzjoni sabiex tinżamm l-istabbiltà fis-servizzi mogħtija, speċjalment f’mumenti ta’ bidliet, kemm domestiċi kif ukoll internazzjonali.
Din l-importanza tidher b’mod partikolari fi żminijiet ta’ elezzjoni ġenerali, bħal dawk li għaddejna minnhom ftit tal-ġimgħat ilu.
F’mumenti meta l-pajjiż ikun qiegħed jiddiskuti viżjonijiet differenti għall-futur tiegħu, is-servizz pubbliku jibqa’ l-element ta’ kontinwità li jżomm il-magna tal-istat taħdem b’serenità, b’stabbiltà u bi professjonalità.
Il-ħidma professjonali tagħkom tassigura li ċ-ċittadin jibqa’ jirċievi s-servizzi essenzjali, l-istituzzjonijiet jibqgħu jiffunzjonaw, u l-istat iżomm il-kredibiltà tiegħu.
Dan jirrikjedi mhux biss kompetenza teknika, li hija l-fulkru li fuqha jissejjes is-Servizz Pubbliku, iżda wkoll sens qawwi ta’ imparzjalità, lealtà lejn il-Kostituzzjoni u rispett lejn il-prinċipji demokratiċi.
Huwa proprju għalhekk li s-servizz pubbliku huwa mibni fuq prinċipji ta’ etika, trasparenza u kontabilità.
Iżda, il-fiduċja tal-poplu fl-istituzzjonijiet ma tinbeniex biss permezz ta’ liġijiet jew policies, iżda permezz tal-esperjenza ta’ kuljum tan-nies meta jiltaqgħu magħkom, meta jħossu li hemm min jismagħhom, u meta jiġu trattati b’dinjità, rispett u sens ta’ ġustizzja.
Għalhekk, is-Servizz Pubbliku għandu dejjem ikun iggwidat mill-ġudizzju, mill-kuxjenza, minn sens profond ta’ responsabbiltà etika, u fuq kollox minn lealtà profodna lejn il-poplu.
Iċ-ċittadini għandhom jiġu trattati b’dinjità u rispett, mingħajr ma tiġi eżerċitata ebda diskriminazzjoni, u dan il-prinċipju huwa mnaqqax fil-Kostituzzjoni tagħna.
Fiż-żmien reċenti, fis-Servizz Pubbliku saru passi importanti biex insaħħu dan l-ispirtu ta’ integrità. Rajna t-tisħiħ tal-Kodiċi tal-Etika, li jenfasizza l-integrità, ir-rispett u l-lealtà bħala valuri ewlenin li jġorru magħhom ħafna obbligi anċillari.
Rajna wkoll l-introduzzjoni ta’ policies kontra l-frodi u l-korruzzjoni, mezzi ta’ rappurtar ta’ abbuż b’mod anonimu u sikur, awditjar intern aktar b’saħħtu, u riformi fis-sistema tal-ġustizzja mfassla biex isaħħu r-responsabbiltà u t-trasparenza.
Infakkar lill-uffiċjali pubbliċi li għandhom jibqgħu jaġixxu skont il-policies u l-proċeduri uffiċjali tal-gvern, imqiegħed hemm mill-maġġoranza tal-poplu u li allura, jissottolinja l-istess sovranità tal-poplu.
Huwa għalhekk li l-uffiċċjali pubbliċi għandhom ikunu leali lejn l-Amministrazzjoni tal-ġurnata fit-twettiq tad-dmirijiet tagħhom, mingħajr ma jdgħajfu jew inaqqsu l-fiduċja pubblika permezz tal-imġieba tagħhom mal-klijenti tas-servizz, in-nies, il-pubbliku.
Qed ngħixu fi żmien meta l-pressjonijiet fuq is-Servizz Pubbliku qed jikbru, u l-aspettattivi taċ-ċittadini dejjem aktar għoljin.
Minn ġurnata għall-oħra, id-domanda biex toffru aktar servizzi u twassluhom fl-iqsar żmien possibbli qed tkompli tiżdied.
Hawnhekk għandu jkun rikonoxxut l-irwol importanti tat-teknoloġija u tal-innovazzjoni fit-twessiegħ tal-aċċessibilità tas-Servizz Pubbliku fil-ġurnata tal-illum. Il-mod kif il-persuna tilħaq is-servizz li tkun teħtieġ, kif is-Servizz pubbliku hekk jilħaq il-bżonn tal-persuni u dan fl-iqsar żmien possibbli.
Huwa għalhekk li s-Servizz Pubbliku adotta għodod u teknoloġiji ġodda, konxju tal-progress teknoloġiku globali, biex jiżgura li l-provvista tas-servizz issir dejjem aktar effiċjenti u aċċessibbli.
Dan sar ukoll grazzi għall-impenn u l-viżjoni tas-Segretarju Permanenti Ewlieni, is-Sur Tony Sultana, li jemmen bis-sħiħ fil-potenzjal tat-teknoloġija bħala mezz biex jitjieb is-servizz lejn iċ-ċittadin. Tony Sultana huwa espert fil-mod kif iressaq l-istrutturi eqreb lejn iċ-ċittadin. Dan diġa esperjenzajnih tul dawn l-erba’ snin li ilu fil-kariga tiegħu.
Rakkomandabbli li f’April li għadda ġiet mnedjia l-istrateġija ġdida fuq medda ta’ tliet snin li ser tkun kruċjali biex is-Servizz Pubbliku jibqa’ jiffunzjona b’mod għaqli u jibqa’ b’saħħtu u fl-istess waqt dinamiku fit-twettiq tal-għoti tas-servizzi lill-pubbliku.
L-istrateġija tara li tolqot l-oqsma kollha biex tiġi assigurata l-inklussività, l-aċċessibilità, il-komunikazzjoni u l-ippjanar strateġiku fit-tul.
Din l-istrateġija hi awgurju tajjeb biex ikompli jissaħħaħ is-Servizz Pubbliku, u s-Servizz Pubbliku jkollu l-għodod kollha neċessarji, jkun dejjem kontemporanju, effiċjenti u jilħaq u jkun milħuq mill-poplu.
Is-Servizz Pubbliku huwa intom, kull wieħed u waħda minnkom individwalment, iżda fuq kollox, flimkien, fid-dipartimenti u entitajiet li fihom tagħtu l-ħidma u l-kontirbut tagħkom u kif fl-aħħar mill-aħħar, din il-ħidma tagħqad, tingħaġen, u ssir waħda impenjata fl-iskop ewlieni, aħħari u kolletiv ta’ Servizz mogħti b’empatija, b’umanita’ u b’rispett lill-poplu kollu.
Xtaqt nagħlaq billi nifraħ lil dawk kollha li l-eċċellenza tagħhom qed tiġi rikonoxxuta llejla. L-eċċellenza titwieled mid-dedikazzjoni ta’ kuljum.
Qabel nagħlaq inħabbrilkom illi, din is-sena, fiċ-ċirkostanzi li niesna u pajjiżna ffaċċjaw kawża tal-Maltempata “Storm Harry”, li seħħet f’Jannar, u l-mod kif dawn ġew indirizzati, inħass li għandu jkun hemm rikonoxximent speċjali.
L-isfidi li ġabet magħha din il-maltempata kienu bosta, u sew waqt, u wara l-maltempata, il-ħaddiema tas-Servizz Pubbliku ħadmu bla waqfien, biex jiżguraw is-sigurtà tal-pubbliku, jirrestawraw servizzi essenzjali, u jindirizzaw bl-aħjar mod effettiv, l-emerġenzi li nqalgħu.
Dan għamluh b’dedikazzjoni kbira, b’impenn, u professjonalità, fis-sinerġija bejn l-unitajiet u d-dipartimenti involuti.
L-impenn u l-ħidma konġunta tagħkom lkoll, għenet biex iċ-ċittadini tagħna baqgħu sikuri, u jħossu lilhom infushom protetti u mwennsa.
Il-poplu Malti jinsab grat għal xogħlkom u għal ħidma tagħkom.
Nawguralkom li tibqgħu twettqu l-missjoni tagħkom b’kuraġġ, b’umiltà u b’determinazzjoni, dejjem għall-ġid tal-komunitajiet tagħna u tal-poplu tagħna, li b’tant imħabba għandna nfittxu li nservuh.