Nilqagħkom fil-Palazz ta’ Sant’Anton għal din il-konferenza stampa li permezz tagħha qegħdin inniedu dan il-kalendarju ta’ attivitajiet, tal-kampanja għall-prevenzjoni tas-suwiċidju, imnedija mis-Servizzi Nazzjonali tas-Saħħa Mentali.
Dan il-kalendarju jinvolvi fih ġabra ta’ attivitajiet li jistidenu lilna lkoll biex nitkellmu, nisimgħu, nitgħallmu u, fuq kollox, naġixxu dwar is-saħħa mentali.
Din is-sena timmarka l-aħħar sena tat-tema internazzjonali ta’ tliet snin, “Nibdlu n-Narrattiva dwar is-Suwiċidju” – sejħa lil kull individwu, kull komunità u kull gvern biex ngħaddu minn kultura ta’ silenzju u taboo għal waħda ta’ tagħrif, informazzjoni u appoġġ.
Minkejja l-progress kbir li sar fl-għarfien, fil-kura u fis-servizzi offruti, is-saħħa mentali għadha, f’ċerti ċirkustanzi, imdawra bis-skiet, bil-mistħija, bil-preġudizzju u wkoll bil-biża’ mill-ġudizzju ta’ ħaddieħor.
L-istigma ma żżommx biss lill-persuna siekta, iżda titfagħha fi kriżi interna ttellgħa u tniżżel jekk titlobx għajnuna, u taf ixxekkilha milli tersaq biex tgħin ruħha permezz tas-servizzi offruti.
Għalhekk, kull diskors dwar is-saħħa mentali għandu jibda mill-prinċipju li kull persuna għandha tiġi milqugħa bid-dinjità, mismugħa mingħajr preġudizzju u megħjuna mingħajr kundizzjonijiet.
Il-promozzjoni ta’ saħħa mentali aktar sana għandha tkun waħda olistika. Jeħtieġ approċċ li jgħaqqad lill-professjonisti tas-saħħa mal-edukaturi, mal-ħaddiema soċjali, mal-awtoritajiet lokali, mal-għaqdiet volontarji, mal-postijiet tax-xogħol u mal-familji.
Matul l-2025 biss, il-linja nazzjonali 1579 irċeviet aktar minn 10,000 telefonata. Wara kull telefonata hemm persuna li ddeċidiet li ma tibqax waħedha mal-ħsibijiet jew mal-biżgħat tagħha.
Dan is-servizz, imħaddem erbgħa u għoxrin siegħa kuljum minn professjonisti tal-psikoloġija, joffri sostenn emozzjonali immedjat, u pariri u gwida dwar is-servizzi disponibbli.
L-għarfien ineħħi l-istigma u jwassal għall-fejqan. Huwa għalhekk li l-ħidma li ser titwettaq mid-Dipartiment Nazzjonali għas-Servizzi tas-Saħħa Mentali matul is-sena li ġejja hija importanti.
Il-ħidma attiva tad-direttorat qed tiffoka wkoll biex tirrikonoxxi l-isfidi marbuta mal-benesseri diġitali, fosthom l-użu problematiku tal-midja soċjali u tal-logħob diġitali. It-teknoloġija tista’ tgħaqqadna, iżda tista’ wkoll iżżid l-iżolament, l-ansjetà u l-espożizzjoni għall-bullying.
Għalhekk irridu ngħinu liż-żgħażagħ jużawha b’mod għaqli u nagħtuhom spazji fejn jistgħu jitkellmu mingħajr biża’ jew ġudizzju.
Aktar ma’ jgħaddi ż-żmien, aktar irridu nirsistu biex persuni li jbatu mis-saħħa mentali jagħmlu l-ewwel pass u jfittxu l-għajuna.
Irridu nkunu minn ta’ quddiem biex nibnu soċjetà fejn li titlob l-għajnuna jitqies bħala att ta’ kuraġġ u mhux bħala sinjal ta’ dgħufija.
Huwa għalhekk li l-inizjattivi tad-Direttorat għas-Servizzi tas-Saħħa Mentali huma intiżi biex jilħqu lill-istudenti, lill-ħaddiema, lill-ġenituri, lill-anzjani, lill-komunitajiet barranin li jgħixu fostna u lil dawk kollha li, għal xi raġuni jew oħra, jistgħu jħossuhom maqtugħin jew minsija.
Inħeġġeġ biex ikun hemm rispons qawwi u magħqud minn entitajiet governattivi u non-governattivi sabiex din il-promozzjoni tassew tkun effettiva u tgħin lil dawk bżonn l-għajnuna, partikularment għajnuna li ttihom mill-ġdid tama għall-ġejjieni u l-forza fiżika u mentali biex jiffaċjaw l-isfidi li l-ħajja taf tpoġġi quddiem kull wieħed u waħda minna.