L-E.T. il-President Myriam Spiteri Debono żaret l-aħħar preparamenti għall-edizzjoni ta’ din is-sena ta’ Rockestra.
Fiċ-Ċentru tal-Fieri u l-Konvenzjonijiet, f’Ta’ Qali, il-President iltaqgħet mal-kantanti, mużiċisti u artisti waqt l-aħħar provi tagħhom qabel il-15-il edizzjoni ta’ dan l-ispettaklu li jiġbor flimkien lil eluf ta’ persuni b’għan nobbli b’risq il-ħidma tal-Malta Community Chest Fund.
Rockestra – The Big Jam se tintroduċi elementi ġodda, fosthom il-kunċett ta’ ‘jam’ fejn il-mużika tal-Orkestra Filarmonika Nazzjonali, diversi kantanti u bands lokali se jingħaqdu flimkien għal prestazzjoni mużikali b’differenza.
F’messaġġ lill-artisti, il-President irringrazzjathom tal-impenn tagħhom, u fakkret li kull min jattendi mhux biss se jgawdi minn spettaklu uniku, imma wkoll ikun qed jgħin lil dawk kollha li jiġu bżonn il-Malta Community Chest Fund.
Il-biljetti għall-15-il edizzjoni ta’ din is-sena ta’ Rockestra, li se ssir is-Sibt li ġej fit-20:30, jistgħu jinkisbu minn: Rockestra 2025 – The Big Jam | ShowsHappening
Għall-ewwel darba, wkoll Rockestra ta’ din is-sena se tkun segwita mill-Official Rockestra After Party, fejn DJs lokali se jkomplu bl-ispettaklu fil-kumpless Uno Malta.
Id-dħul għall-After Party hu b’xejn, għalkemm ikun apprezzat jekk dawk li jattendu jagħtu donazzjoni b’risq il-Malta Community Chest Fund.
