Il-President ta’ Malta Myriam Spiteri Debono, ħalliet il-pajjiż għal żjara uffiċjali fi Strasburgu, Franza, fejn fost l-oħrajn se tindirizza l-Assemblea Parlamentari tal-Kunsill tal-Ewropa.
Din iż-żjara qed issir f’mument importanti għal pajjiżna, hekk kif Malta bħalissa għandha l-Presidenza tal-Kumitat tal-Ministri tal-Kunsill tal-Ewropa.
L-impenji uffiċjali tal-President fi Strasburgu jibdew it-Tlieta, meta l-President tindirizza ċ-ċelebrazzjoni tal-jum nazzjonali ta’ Malta, organizzata mir-Rappreżentanza Permanenti ta’ Malta għall-Kunsill tal-Ewropa, fi Strasburgu. Għal din iċ-ċelebrazzjoni, bit-tema tal-festa Maltija, jattendu wkoll id-Deputat Prim Ministru u Ministru għall-Affarijiet Barranin u t-Turiżmu, Ian Borg, is-Segretarju Ġenerali tal-Kunsill tal-Ewropa, Alain Berset, u l-President tal-Assemblea Parlamentari tal-Kunsill tal-Ewropa (PACE), is-Sur Theodoros Rousopoulos.
Il-qofol taż-żjara tal-President fi Strasburgu jintlaħaq l-Erbgħa, meta l-President Myriam Spiteri Debono se tindirizza s-sessjoni plenarja tal-Assemblea Parlamentari tal-Kunsill tal-Ewropa, segwita minn indirizz ieħor, din id-darba lill-grupp Women@PACE, li jiġbor fih lill-parlamentari nisa membri tal-Assemblea Parlamentari tal-Kunsill tal-Ewropa.
Matul iż-żjara, il-President se jkollha wkoll laqgħat mas-Segretarju Ġenerali tal-Kunsill tal-Ewropa, Alain Berset, u mal-President tal-Assemblea Parlamentari tal-Kunsill tal-Ewropa (PACE), is-Sur Theodoros Rousopoulos. Għal dawn il-laqgħat, id-delegazzjoni Maltija se tkun iffurmata wkoll mill-Ministri Ian Borg u Clifton Grima, l-uffiċjali mill-Uffiċċju tal-President ta’ Malta, Moira Attard u Darren Camilleri, u wkoll il-Kap tad-Delegazzjoni Parlamentari għall-Kunsill tal-Ewropa, Naomi Cachia.
Il-President Myriam Spiteri Debono mistennija tirritorna Malta tard l-Erbgħa filgħaxija. Waqt iż-żjara tal-President barra minn Malta, Dott. Helena Dalli se sservi bħala l-Aġent President.