Is-Sibt filgħaxija saret Rockestra – The Big Jam, li offriet spettaklu mużikali u artistiku lil eluf ta’ persuni li mlew iċ-Ċentru tal-Fieri u l-Konvenzjonijiet, f’Ta’ Qali.
Il-kunċert, organizzat mill-Malta Community Chest Fund taħt id-direzzjoni artistika ta’ Paul Borg Bonaci u d-direzzjoni mużikali ta’ Maestro Aurelio Belli, ġabar flimkien lill-Orkestra Filarmonika Nazzjonali u l-aqwa talent lokali li ppreżentaw kanzunetti klassiċi u moderni.
L-E.T. il-President Myriam Spiteri Debono u r-raġel tagħha, Dr Anthony Spiteri Debono ngħaqdu ma’ dawk li attendew għal Rockestra b’risq il-ħidma tal-Malta Community Chest Fund.
Wara l-kunċert, l-E.T. ltaqgħet mal-kantanti, artisti u mużiċisti fi tmiem Rockestra, fejn irringrazzjonathom tal-impenn tagħhom b’risq din il-kawża ġusta, u esprimiet is-sodisfazzjon tagħha għall-ispettaklu offrut matul din l-ewwel edizzjoni taħt il-Presidenza tagħha.
Il-President tirringrazzja wkoll lill-eluf ta’ persuni li attendew Rockestra, li bid-donazzjoni tagħhom se jagħtu daqqa t’id lill-Malta Community Chest Fund biex tkompli tgħin lil dawk kollha li jiġu bżonnha.
