Julian Fenech, student tas-sitt sena tal-Iskola Primarja STC Annibale Preca ta’ Ħal Lija rċieva l-Premju Papa Ġwanni XXIII għat-Tjubija, waqt ċerimonja li saret taħt il-patroċinju tal-E.T. Myriam Spiteri Debono, il-President ta’ Malta, fil-Palazz ta’ Sant’Anton.
Il-Premju, organizzat minn Patri Dijonisju Mintoff u mil-Laboratorju tal-Paċi, jirrikonoxxi t-tjubija u l-kompassjoni ta’ Julian, li ta’ kuljum jagħmel ġesti pożittivi b’risq sħabu tal-iskola, b’mod partikolari fil-konfront ta’ wieħed mill-istudenti.
Fost l-oħrajn, Julian kien nominat għall-impenn biex studenti barranin fil-klassi tiegħu jkunu inklużi fil-ħajja ta’ kuljum tal-iskola, fosthom billi jittraduċi dak li jkun għaddej, u jinkludihom fil-logħob. Kien rikonoxxut ukoll għall-karattru tiegħu, b’mod speċjali l-isforzi biex jevita l-argumenti u l-impenn biex iferraħ lill-oħrajn.
Fid-diskors tagħha, il-President Myriam Spiteri Debono enfasizzat fuq dawn il-valuri, u waqt li indirizzat lill-ġenituri u l-edukaturi preżenti, irrikonoxxiet l-importanza li nrawmu fi wliedna s-sens ta’ altruwiżmu. Il-President aċċennat li dawn il-valuri jservu bħala l-pedamenti ta’ soċjetà iktar b’saħħitha, li tinkludi lil kulħadd fi ħdanha.
Il-President qalet li hu b’dan il-mod li t-tfal jirrikonoxxu l-valur ta’ kull wieħed u waħda minnhom, tissaħħaħ il-kunfidenza fihom infushom, u b’hekk ikunu parti integrali u jikkontribwixxu fis-soċjetà.
Min-naħa tiegħu Patri Dijonisju Mintoff, li ilu jorganizza dan il-Premju għal 55 sena, tkellem dwar kif ġesti bħal dawk ta’ Julian huma importanti u li hu meta wieħed jgħix ħajtu b’dawn il-valuri li s-soċjetà tgħożż u tgħix fil-paċi.
