Ninsab kuntenta li qiegħda magħkom ilkoll illum f’din l-okkazzjoni tal-ftuħ uffiċjali tas-St Michael’s Hospice.
Nifhem u napprezza s-sodisfazzjon tagħkom li din il-binja, b’dak kollu anċillari għaliha wara ħafna snin ta’ sagrifiċċji u xogħol, tinsab lesta u kompluta u ser tibda testendi aktar is-servizzi importanti li jagħmlu d-differenza fil-ħajjiet ta’ mijiet ta’ persuni u tal-familji tagħhom, li isibu ruħhom f’ċirkostanzi li jirrikjedu sostenn.
Kull sena, il-Hospice tilqa’ fi ħdana ’il fuq minn 1,500 pazjent li jsofru minn mard serju bħall-kanċer, motor-neuron diseases u mard li jaffettwa l-pulmun, il-kliewi u l-fwied.
Tul il-ħamsa u tletin sena ta’ attività’, sa’ mit-twaqqif tagħha fl-1989, il-Hospice Malta kienet hemm għas-sapport ta’ individwi li għaddejjin minn mumenti diffiċli f’ħajjithom minħabba problemi ta’ saħħa.
Il-Hospice Malta hija marbuta mal-valuri tas-solidarjetà, tal-faraġ, u fuq kollox tat-tama; tama li tiġi konvertita f’serħan mill-piżijiet fiżiċi li jaħkmu lill-pazjenti li jkunu qed iġorruwhom, u minn piżijiet psikoloġiċi li anke jaħkmu lill-familji tagħhom.
U dan isir kollu mingħajr ebda piż ta’ ħlas fuq il-pazjent jew il-familja tiegħu.
Naf kemm iżżommu fuq quddiem tal-viżjoni u l-ħidma tagħkom, id-dinjità, li f’mumenti ta’ tbatija, tkun bżonjuża sabiex il-pazjent ma jħossux mwarrab u b’mod speċjali, ma jħossux mormi.
Il-kura paljattiva, hija kura multi dimensjonali u tinkludi fiha mezzi diversifikati li jiffukaw mhux biss fuq l-kura medika, li issa anke ser tibda’ tingħata f’ambjent aktar attrezzat, iżda tinvolvi wkoll l-elementi umani tal-empatija, l-ġenerożita’, u l-għożża.
B’hekk, apparti l-vjaġġ li jimbarka fih il-pazjent flimkien mal-familja tiegħu fir-rigward tal-mard li jkun isofri minnu, il-pazjent u l-familja tiegħu fil-Hospice isibu wkoll l-appoġġ emozzjonali u psikoloġiku, li huwa importanti daqs il-kura f’din il-mixja.
Tul is-snin il-Hospice Malta evolviet b’mod dinamiku. Permezz ta’ dan l-investiment fis-St Michael’s Hospice, is-servizzi twessgħu sabiex jipprovdu sostenn sew għal in-patients kif ukoll outpatients.
Opri bħal dawn ma jsirux mil-illum għal għada. Konvinta li wara dan il-proġett kien hemm il-ħidma ta’ għexieren ta’ voluntiera li ta’ kuljum kienu ta’ wens għall-operat u l-klijenti tal-Hospice Malta.
Bil-ħin, l-enerġija u l-kompassjoni li tajtu u tagħtu b’mod volontarju lil min hu fil-bżonn, intom il-voluntiera qegħdin tkunu raġġ ta’ tama ma dawk li l-mard u ċ-ċirkostanzi li jġib miegħu għamluhom vulnerabbli.
Wieħed irid isemmi wkoll li minbarra l-kura eċċezzjonali li ser tkun qed tingħata hawnhekk, il-ħidma tal-Hospice Malta ser tkun qed testendi ruħha wkoll permezz ta’ tagħlim li jilħaq kemm l-istaff kif ukoll lill-istudenti ta’ professjonijiet mediċi u anċillari f’livell undergraduate u anke post-graduate.
B’dan il-mod, is-servizz li jingħata jibqa ta’ kwalita’ għolja u jibqa’ jiġġedded maż-żmien.
Nirrikonoxxi l-impatt pożittiv tal-ħidma tagħkom fis-soċjetà tagħna. Ix-xogħol li jsir minnkom huwa prova konkreta tas-sensiela ta’ valuri ġenerużi li jħaddan il-poplu Malti.
Bl-isforzi tagħkom fi ħdan il-Hospice Malta, qed terfgħu xi ftit mill-piż li għandhom mijiet ta’ familji għaddejjin minn tbatija.
L-eżempju tagħkom irawwem kuxjenza fost iż-żgħażagħ tagħna biex ikomplu dak li qed tagħmlu intom, u tħeġġuhom ifittxu karriera fis-settur tal-kura paljattiva.
Proġett u investiment bħal dan iservi wkoll biex jinforma lill-pubbliku bil-ħtieġa tal-kura paljattiva b’ċerta mard, speċjalment dak terminali. Din l-informazzjoni hija neċessarja biex diskussjonijiet dwar suġġetti etiko-mediċi jkunu mgħarbla profondament u bis-serjetà.
Insellem il-ħidma tal-professjonisti kollha fis-settur u magħhom lil dawk il-voluntiera li jagħtu parti minn ħajjithom. Permezz tal-impenn u d-dedikazzjoni tagħkom, il-pazjent jista’ jkompli jgħix b’dinjita’ u b’serħan il-moħħ li hemm xi ħadd dejjem lest li jgħinu.
Nirringrazzja wkoll lill-amministrazzjoni tal-Hospice Malta, lis-Sinjura Bernadette Bonnici Kind u lis-Sur Kenneth Delia li flimkien mat-tim abbli tagħhom, qed jagħmlu d-differenza fil-ħajja ta’ minn jirrikorri għas-servizz tal-Hospice. Napprezza t-tenaċita tagħhom, il-mod sħiħ li bih emmnu f’dan il-proġett u l-ħidma u s-sagrifiċċji li għaddew minnhom biex dan il-proġett sar realtà.
Persważa li minkejja li ż-żieda sostanzjali fid-domanda għall-użu tas-servizzi tagħkom, il-Hospice ser jibqa’ jieħu ħsieb lil dawk li jersqu għall-għajnuna bl-għożża u bl-imħabba li l-Hospice taf toffri f’mumenti kritiċi fil-ħajja tan-nies.
