Ninsab hawn fostkom illejla sabiex flimkien bħala nazzjon nonoraw lill-anzjani tagħna, biex nirikonoxxu l-kontribuzzjonijiet tagħhom fis-soċjetà, u wkoll nagħtu ġieħ lill-entitajiet, għaqdiet u individwi li jappoġġjaw il-kunċett tal-anzjanità attiva.
Dan l-avveniment huwa xhieda ħajja li meta nixjieħu ma jfissirx li niritraw, li nċedu l-armi, għaliex sakemm inżommu ruħna f’saħħitna, fiżikament, mentalment u emozzjonalment, kull wieħed u waħda minna għadna nistgħu nkunu ta’ kontribut fil-komunitajiet tagħna.
Dan l-ispirtu rajnih, fost l-oħrajn illejla, fl-esperjenzi ta’ dawk li ġew nominati, u b’mod speċjali tal-koppja Jeanpierre u Iliana Azzopardi, rebbieħa tal-Premju Anzjanità Attiva għal din is-sena, li minkejja li llum il-ġurnata pensjonanti, qed jagħtu ħinhom b’mod volontarju billi waqqfu grupp f’Tal-Ibraġġ biex l-anzjani ta’ din il-komunità jżommu ruħhom attivi, qed ikunu ta’ sostenn għall-oħrajn u jbegħduhom mid-dwejjaq tas-solitudni, li ħafna drabi, kull ma’ jmur, qed tkun id-destin ta’ ħafna anzjani fil-pass mgħaġġel u impenjattiv tal-ħajja fil-ġurnata tal-illum.
Dan l-ispirtu attiv, spirtu ta’ ħerqa għall-ħajja u s-sabiħ li tista’ toffri meta niddedikaw ħsieb u wens għal ħaddieħor, impenji ġodda f’fażi ġdida ta’ ħajjiet il-bniedem, rajnieh fin-nominati u rebbieħa tal-premjijiet l-oħra. Ta’ dan, f’isem l-Istat, nirringrazzjakom tal-impenn tagħkom.
L-adulti anzjani f’Malta u Għawdex – u dan qed tixduh intom fostna llejla – huma bil-provi pilastri ħajjin tal-komunitajiet tagħna.
Eżempji ċari li qed juruna li s-snin tax-xjuħija jistgħu jkunu żminijiet sbieħ, fejn l-anzjani jibqgħu jaġġornaw u jinvolvu ruħhom, b’mod attiv, kulħadd bil-modi tiegħu.
Il-ħsieb li ħadd m’għandu jitħalla lura, jagħmel ħafna u ħafna sens f’attività bħal din tal-lejla.
Fil-fatt, insemmi kif il-viżjoni nazzjonali ta’ Malta għall-2050 tħaddan dan il-prinċipju, u tiżgura li kull ċittadin, irrispettivament mill-età, ikollu aċċess għall-appoġġi meħtieġa għal ħajja sana, dinjituża, u sodisfaċenti.
Dan imur ‘lil hinn mill-għoti ta’ servizzi speċifiċi li jeħtieġu l-anzjani, iżda jimxi id f’id magħhom. Irid ikun hemm ukoll il-ħolqien ta’ ambjenti u opportunitajiet fejn l-anzjani jistgħu jirnexxu fiżikament, soċjalment, u diġitalment.
Il-Politika Strateġika Nazzjonali għall-Anzjanita Attiva sal-2030 u l-Istrateġija ta’ Malta għall-Iżvilupp Sostenibbli sas-sena 2050 jiddeskrivu pjan b’direzzjoni, biex jissalvagwardjaw il-benessri u l-inklużjoni tal-anzjani fl-aspetti kollha tal-ħajja.
Huwa wkoll inkoraġġanti li tara numru ta’ Ċentri għall-Anzjanità Attiva madwar Malta u Għawdex, bl-opportunità li l-anzjani jiltaqgħu ma’ persuni ġodda f’atmosfera familjari.
Ninnota wkoll kif f’dan kollu isiru anke sessjonijiet li jinkludu eżerċizzji fiżiċi, żfin, snajja, tagħlim dwar l-ewwel għajnuna, informazzjoni dwar l-Informatika u attivitajiet li jiġbru flimkien ġenerazzjonijiet differenti biex b’hekk ikun hemm iktar sinerġija fil-komunitajiet.
Fil-fatt innutajt anke kif illum ġew onorati anzjani għall-involviment tagħhom fl-Innovazzjoni u t-Teknoloġija, fl-isports, fil-volontarjat, is-solidarjetà bejn il-ġenerazzjonijiet u anke fil-kultura.
Dan kollu huwa prova ċara u prattika tal-impenn tal-Gvern, tal-Ministeru u s-Segretarjat Parlamentari konċernati, u tal-awtoritajiet, biex jinbidlu f’realtajiet tanġibbli u li fl-istess ħin itejjbu l-kwalità tal-ħajja taċ-ċittadini.
Dawn l-inizjattivi għandhom jibqgħu frekwenti u aċċessibbli biex tinżamm il-kwalità u l-effettività tagħhom fil-ħajja tal-anzjani tagħna.
Irridu niżguraw li kull min jeħtieġ appoġġ jew gwida dan qiegħed isibha u li proġetti mmirati li jinvolvu lill-anzjani b’mod attiv fil-komunità tagħna jibqgħu jitjiebu kontinwament.
Huwa għalhekk li għandna niżguraw li l-policies u l-istrateġiji li għandna, ikunu dejjem ikunu ggwidati mill-esperjenzi tal-ħajja u l-vuċijiet tal-anzjani tagħna nfushom.
Inħoss li sfida urġenti, li f’bosta okkażjonijiet tkellmu diversi anzjani miegħi personalment dwarha. Din hija l-inklużjoni diġitali.
F’era fejn is-servizzi essenzjali, l-interazzjoni soċjali, u anke l-informazzjoni dwar is-saħħa dejjem aktar jiċċaqalqu online, irridu niżguraw li aktar milli jeskludi, dan kollu jagħti raġuni biex naraw kif ħadd ma jibqa’ lura u jkun eskluż. Hemm ħiliet li rridu naraw li l-anzjani tagħna jkollhom.
Soċjetà li tħalli lill-membri anzjani tagħha lura fl-era diġitali tirriskja li tapprofondixxi l-iżolament aktar milli trawwem l-indipendenza.
L-isforzi kontinwi li qed isiru, kemm mill-Gvern ċentrali, mill-Kunsilli Lokali u anke minn għaqdiet mhux governattivi fit-taħriġ tal-ħiliet diġitali u l-aċċessibbiltà tal-komunità jiżguraw li t-teknoloġija tkun pont għal għajxien aħjar u mhux ostaklu.
Inkun qed nonqos jekk ma naċċennax għall-fatt illi jrid ikollna l-għarfien; irridu nisħqu fuq il-perikli li t-teknoloġija ġabet magħha, illi bosta anzjani qed jispiċċaw vittmi ta’ frodi onlajn, u naħseb illi s-solitudni li wħud ikunu qed isofru minnha, l-għatx għall-empatija, jagħmilha aktar suxxettibbli li jinqabdu f’morsa ta’ imbrolji.
Il-kwalità tal-ħajja tibqa’ ċentrali għall-viżjoni ta’ pajjiżna għall-anzjani tagħna. Huwa tajjeb u sewwa li l-awtoritajiet jirrikonoxxu li l-anzjani, bl-esperjenza u l-għerf tagħhom, huma ta’ benefiċċju u ta’ ġid għall-ġenerazzjonijiet iżgħar minna.
Biss nisħaq illi l-anzjani li għadhom igawdu s-saħħa, jridu jkunu wkoll huma li joħolqu l-opportunità, biex fil-fażi ta’ anzjanità f’ħajjithom, mill-ġdid iwelldu interessi ġodda li jżommuhom mentalment u fiżikament attivi.
Hekk kif qed insemmi l-ġenerazzjonijiet, nappella biex ilkoll kemm aħna nħeġġu liż-żgħażagħ tagħna biex jersqu lejna. Dik l-interazzjoni, anke lilna żżommna iktar b’mentalità miftuħa biex nifhmu kif qed tinbidel id-dinja madwarna.
Biex nikkonkludi, nixtieq nesprimi l-gratitudni tiegħi lill-Ministeru għas-Saħħa u l-Anzjanità Attiva u lis-Segretarjat Parlamentari għall-Anzjanità Attiva, lit-tim li organizzaw din is-serata tal-lejla u inthom, li fil-maġġoranza tagħkom li hawn illejla, għadkom toffru l-impenn biex taraw soċjetà aħjar. Grazzi tal-impenn tagħkom, matul ħajjitkom, għal pajjiżna.
Kull riproduzzjoni ta’ dan id-diskors teħtieġ permess minn qabel mill-Uffiċċju tal-President ta’ Malta. Jekk jogħġbok ikkuntattja l-Uffiċċju tar-Relazzjonijiet Pubbliċi fuq [email protected] u [email protected].