Iltqajna llejla sabiex flimkien nikkomemoraw il-ħamsa u għoxrin (25) sena mit-twaqqif tal-Gozo Business Chamber.
B’dan il-pass, għall-ewwel darba, l-operaturi Għawdxin ħolqu għalihom niċċa illi permezz tagħha, leħinhom jibda’ jinħass iktar, u dan peress illi raw li jiġbru u jaħdmu għall-aspirazzjonijiet komuni tas-settur.
Tul is-snin, il-funzjonijiet tal-Kamra tal-Kummerċ Għawdxija espandew biex ilaħħqu mal-progress li kien iseħħ fil-gżira Maltija, bl-iskop illi Għawdex u l-Għawdxin ukoll iħossu mill-qrib il-prosperità li kienet qiegħda tinħoloq.
Il-Kamra tal-Kummerċ baqgħet iżżomm l-interessi tan-negozji f’Għawdex bħala prijorità. Bdiet tippromwovi wkoll opportunitajiet kummerċjali lokali u anke internazzjonali, speċjalment wara s-sħubija sħiħa ta’ Malta fl-Unjoni Ewropea li ġabet magħha politika ta’ kummerċ ħieles.
Il-preżenza tal-istess Kamra tal-Kummerċ f’fora internazzjonali bħall-Kamra tal-Kummerċ Insulari tal-Unjoni Ewropea, l-INSULEUR, ħolqot opportunità biex l-Għawdxin, ma’ msieħba oħrajn, jiġu maqsuma l-isfidi li jaffaċċja Għawdex bħala reġjun.
Il-feles ilma li jifred lill-gżira t’Għawdex mill-gżira ta’ Malta, joħloq realtà differenti fejn jidħol Għawdex, inkluż fil-mod ta’ kif l-ekonomija f’Għawdex għandha titnissel, u kif tista’ tifjorixxi.
It-taħlita ta’ wirt urban u rurali, flimkien mas-sbuħija naturali tal-kampanja u l-pajesaġġ Għawdxi, joħolqu f’Għawdex potenzjal ta’ viżjoni ekonomika diversa u distinta minn dik ta’ Malta.
Dan kollu, flimkien mal-insularità doppja, u s-sitwazzjoni u l-importanza ta’ aċċessibilità, li din iġġib magħha, dejjem irrikjedew illi Għawdex ikollu viżjoni u pjan partikolari għalih.
Il-konnettività ma’ Malta tibqa’ dejjem kruċjali għalina l-Għawdxin. Għalhekk, huwa importanti li tibqa’ tiġi mistħarrġa l-possibilita’ sostenibbli fejn tidħol riġenerazzjoni u rinnovazzjoni tal-flotta tal-Gozo Channel.
Kooperazzjoni mill-qrib bejn l-Awtorita għall-Izvilupp Reġjonali Għal Għawdex u l-Kamra tal-Kummerċ Għawdxija,i rriżultat fi tħejjija ta’ żewġ rapporti importanti li flimkien ingħataw li-isem ta’ rapport li jirrigwardja l-Gozo Business Sentiment.
Dan ir-rapport jindika biċ-ċar li minkejja li hemm fiduċja dwar l-istabbilità tan-negozju u l-kummerċ f’Għawdex għal din is-sena ġdida li għadna kif bdejna, jeżistu ċirkostanzi li jinkwetaw lis-sidien tan-negozji Għawdxin.
Fost dawn hemm nuqqas ta’ riżorsa umana, għaliex problema sollevata u li, ripetutament, minn diversi bnadi, ġiet indikata lili personalment, hija illi donnu jidher li għadha preżenti l-attitudni antika illi jkun preferut l-impjieg mal-Gvern fuq l-impjieg offrut mill-privat. Għandna naraw x’inhi r-raġuni għalih, għaliex dan ixekkel l-espansjoni kummerċjali, u jaqta’ l-qlub meta proxxmu jiġi biex jagħmel investimenti fi proġetti ġodda.
Minn dan ir-rapport, dwar il-Gozo Business Sentiment, joħroġ ukoll li negozji fis-settur tal-kostruzzjoni qed jantiċipaw tnaqqis tax-xogħol f’dan is-settur.
Din ma narahiex xi element negattiv. Anzi, jekk wieħed jieqaf u jaħseb, tidher li hija indikatur ta’ reazzjoni f’waqtha għal dak li għandu x’jaqsam mas-settur ta’ binijiet ġodda fil-pajsaġġ Għawdxi, partikolarment, jekk wieħed iżomm fuq quddiem l-importanza li jkun protett dan l-istess pajsaġġ, sew mil-lat rurali kif ukoll mil-lat urban.
Wieħed jinnota li hemm miżuri kumplimentari għal dan il-għan, illi ġew imnedija fl-estimi finanzjarji tas-sena l-oħra, fejn kien hemm inċentivi fir-rigward ta’ xiri ta’ propjetà immobbli eżistenti, mibnija aktar minn għoxrin sena ilu, illi kienu vakanti għal aktar minn seba’ snin.
Ir-rakkomandazzjonijiet biex tinstab soluzzjoni għal punti mqajma minn dawn ir-rapporti diġa’ jiffurmaw parti mill-Istrateġija ta’ Żvilupp Reġjonali għal Għawdex, imnedija mill-Awtorita’ għall-Iżvilupp Reġjonali għal Għawdex fl-2023, wara diversi konsultazzjonijiet bilaterali, inkluż mal-Gozo Business Chamber.
L-Istrateġija tħejji diversi miżuri għall-għaxar snin li ġejjin.
Mill-aspett ekonomiku u kummerċjali, id-dokument jiffoka, b’mod partikolari, fuq l-importanza tal-promozzjoni ta’ diversifikazzjoni f’setturi ġa eżistenti bħall-agrikoltura u t-turiżmu, iżda jindika l-bżonn li l-innovazzjoni diġitali tittieħed bis-serjetà. Hawn diġa’ smajna lill-Presiden ttla-Gozo Business Chamber, fuq id-Digital Hub, u kif dan jista’ jiġi megħjun iktar ħalli jkun hawn iktar diversifikazzjoni.
Din l-istrateġija għandha sservi bħala l-pedament fundamentali għat-tfassil ta’ politika u miżuri fil-ġejjieni li jgħinu biex jiġi garantit żvilupp sostenibbli u integrat fil-Gżira Għawdxija; jiġu identifikati opportunitajiet ġodda, iżda tibqa’ konservata l-identità unika t’Għawdex.
F’termini kummerċjali, dan ifisser li intrapriżi żgħar u medji u startups Għawdxin stess għandhom jiġu mgħejuna biex jifjorixxu fil-gżira Għawdxija stess permezz ta’ għajnuniet speċifikament għalihom, inkluż għajnuna biex l-aċċess għall-fondi Ewropej isir iktar faċli.
Għalhekk huwa importanti li jkun hemm l-input politiku sabiex l-istrateġija ma tibqax biss linka fuq il-karta. Dan importanti ħafna għall-iżvilupp kummerċjali sostenibbli ta’ Għawdex fil-futur, u mhux biss għall-għaxar snin li ġejjin.
Ir-rapporti ta’ Strateġija għall-Iżvilupp Reġjonali t’Għawdex, huma neċessarji u għandhom jsiru minn żmien għal żmien, biex dejjem jipprovdu l-aġġornament meħtieġ skond żviluppi li jkun hemm jew li jistgħu jiġu previsti u pjanati.
Il-kunċett ta’ sostenibbilità, li huwa msemmi diversi drabi fl-Istrateġija, għandu jkun l-fus tal-ħidma futura f’Għawdex. L-attrazzjoni ta’ investimenti u kummerċ sostenibbli f’kull qasam hija importanti biex Għawdex, iżomm l-elementi bażiċi u partikolari tiegħu u jattira lejn Għawdex, anke minħabba n-natura tiegħu, il-kwalità aktar milli l-kwantità, u jkollu ekonomija soda.
Hekk kif inħarsu ’l quddiem biex l-isfidi naqilbuhom f’opportunitajiet, inħeġġeġ lill-Kamra tal-Kummerċ Għawdxija biex fil-futur tkompli bil-ħidma tagħha favur l-iżvilupp tal-kummerċ f’Għawdex bħal ma’ għamlet fl-aħħar 25 sena u tkun dejjem viġilanti, biex dejjem ikollha subgħajha fuq il-polz tal-problemi li aħna, bħala Għawdxin, naffaċċjaw.
