Aċċettajt bil-qalb li din is-serata tittella’ hawn, fil-Palazz ta’ Sant’Anton.
Għandi memorja ta’ meta kont tifla, meta kelli sitta jew seba’ snin, li darba mort ma’ missieri f’Villa Drusilla, għand l-avukat George Zammit, biex jieħu xi pariri fuq il-kera ta’ postijiet li kellhom mikrijin.
Dak l-episodju baqa’ stampat f’moħħi, u dejjem ammirajt l-istil tiegħu, sempliċi u kellu ħabta kif juża’ kliem li jfitihem mill-qarrejja kollha, irrispettivament mill-istandard akkademiku tagħhom. Dak li kien jikteb, kulħadd kien jifhmu.
Nara li fil-kitbiet tiegħu, apparti l-kitba stess, hemm ċertu spirtu u animu li mhux mill-poeżija biss, imma wkoll mill-proża, joħroġ il-fatt kemm kien raġel li jħobb in-natura u t-tradizzjonijeit tagħna. Kien iħobb lin-nies, għax kieku ma tkunx raġel li tħobb lin-nies, ma tasalx li dawk iż-żewġ karattri ta’ Wenzu u Rożi tpenġihom b’tali mod li tistħajjilhom ħerġin minn bejn il-link.
L-apprezzament, mil-lokalitajiet tagħna, tan-nies tal-lokal, hu importanti ħafna. Ngħid li hi ħasra li serata bħal din, b’dokumentarju bħal dak, ma tarawx kif tirranġaw mad-Dipartiment tal-Edukazzjoni, biex jidher fl-iskejjel. Nemmen li għandu jkun hemm inkoraġġiment biex isiru attivitajiet bħal dawn mill-Kunsilli Lokali. Xejn xejn, inħajru liż-żgħar tagħna li jimpenjaw ruħhom fl-istorja tagħna, il-lingwa tagħna, u f’dak kollu li hu ċiviku.
Hu b’hekk li nnisslu l-lealtà lejn pajjiżna; il-lealtà hi prezzjuża ħafna, u minnha joħroġ l-ispirtu li int trid tara lil pajjiżek u lil niesek aħjar – kemm lil Maltin oħra bħalek u lil dawk li jiġu jgħixu fostna.
F’George Zammit irridu napprezzaw ukoll il-ħidma letterarja tiegħu li bdiha u kattarha fi żmien meta l-apprezzament tal-letteratura Maltija kien għadu se jibda jitgħallem jimxi.
Kull riproduzzjoni ta’ dan id-diskors teħtieġ permess minn qabel mill-Uffiċċju tal-President ta’ Malta. Jekk jogħġbok ikkuntattja l-Uffiċċju tar-Relazzjonijiet Pubbliċi fuq [email protected] u [email protected].