Għat-tieni sena konsekuttiva, qiegħdha hawn magħkom għall-għoti tal-Premju Soċjetà Ġusta.
Nirringrazzja l-ewwelnett lill-Ministeru għall-Inklużjoni u Volontarjat li għal sena oħra reġa’ tella din is-serata importanti li tirrikonoxxi l-ħidma fost il-persuni b’diżabilità.– u dan għaliex għandu jkun l-għan ta’ kulħadd li ninterpretaw id-diżabilità ta’ persuni mill-aspett uman, b’mod dinjituż u fuq kollox inklussiv.
Dawn ir-rikonoxximenti jagħtu ġieħ u jesprimu s-sens ta’ apprezzament imma wkoll ta’ responsabbilità tagħna lkoll lis-settur tad-diżabilità f’pajjiżna.
L-attività tal-lejla sservi ta’ opportunità biex nirrikonoxxu l-ħidma ta’ bosta individwi, attivisti u entitajiet li jiddedikaw il-maġġorparti tal-ħin tagħhom u ħajjithom għas-settur tad-diżabilità.
Barra minn hekk, isservi wkoll biex inkomplu nisħqu fuq l-importanza ta’ ħidma akbar, partikularment fil-qasam tal-inklussività soċjali, li huwa prinċipju fundamentali biex is-soċjetà tkompli tikber u tissaħħaħ.
Premju Soċjetà Ġusta għaliex tassew ifakkruna f’għażliet importanti li nagħmlu ta’ kuljum: dawk l-għażliet li bihom nibnu soċjetà li ma tagħlaqx il-bibien tagħha quddiem l-ebda individwu, soċjetà li tħaddan lil kull wieħed u waħda minnha b’rispett u dinjità.
Inħoss li għandna dmir, kemm bħala poplu u anke bħala l-kolletività soċjali tagħna, li napprezzaw il-ħidma ta’ kull wieħed u waħda minna li jirsisti biex ebda individwu, Malti jew barrani li jkun fostna, ma jaqa’ lura għaliex ma jlaħħaqx mal-progress soċjo-ekonomiku ta’ pajjiżna.
Illejla rajna għoti ta’ rikonoxximenti lill-għaqdiet volontarji filwaqt li ngħataw rikonoxximenti wkoll lil dawk il-persuni li esprimew sforzi eċċezzjonali biex jiksbu indipendenza u dan biex ħajjithom ukoll iħossuhom membri sħaħ tas-soċjetà tagħna.
Dawk l-individwi li, minkejja d-diżabilità, xorta għamlu minn kollox biex jagħtu sehemhom lis-soċjetà mhux jippretendu biss mingħand is-soċjetà u lil dawn jien kull wieħed u waħda minnhom, dawk rikonoxxuti llejla u oħrajn bħalhom li hemm fis-soċjetà tagħna nirringrazzjahom minn qalbi għax huma eżempju għal oħrajn.
Huwa ferm sabiħ li eżempji bħal dawn jirriflettu kif soċjetà tassew ġusta titkejjel mhux biss minn kif nabbraċjaw lil min l-aktar ikun f’saħħtu imma kif ukoll nieħdu l-eżempju ta’ min jasal minkejja dawk l-ostaġġi li forsi n-natura u wkoll is-soċjetà tagħna għandu u jiffaċċja ta’ kuljum.
L-iżvilupp u l-istat li ninsabu fih illum ma ġiex waħdu. Sat-tmiem it-Tieni Gwerra dinjija, persuni b’diżabilità f’pajjiżna ma kienux qed jiġu ttrattati bil-mod kif kienu qed jiġu ttrattati llum. Kien hemm l-ewwel nett nuqqas ta’ għarfien li ħafna drabi kien jissarraf f’nuqqas ta’ kompassjoni u empatija u wkoll anke l-pajjiż ma kienx żviluppat b’tali mod li amministrazzjoni wara oħra tipprova illi kull settur li għandna nsostnuh anke mill-istat b’ċertu bżonnijiet.
Biż-żmien iżda, grazzi għall-attiviżmu ta’ pijunieri fis-settur tad-diżabilità, f’pajjiżna rajna sseħħ bidla u nbeda proċess rigoruż biex persuni b’diżabilità joħorġu fil-beraħ iżda jkunu huma stess illi jagħrfu illi jiskavaw it-toroq biex jaslu bl-għajnuna dejjem ta’ ħaddieħor, ilkoll kemm aħna kif aħna għandna bżonn l-għajnuna ta’ ħaddieħor biex naslu, imma l-isforz fuq quddiem nett kien minn dawn il-persuni stess.
F’Malta trawwam sens ta’ inklużjoni, grazzi għall-kollaborazzjoni attiva, u fuq kollox kollaborazzjoni illi tinkoraġġixxi inklussività bejn il-Gvern, l-għaqdiet mhux governattivi, il-persuni b’diżabilità u l-familji tagħhom.
Fuq kollox wieħed għandu jsemmi kif din il-ħidma għandha prinċipju bażilari, “Xejn dwarna, mingħajrna” – Huma dawn il-persuni li għandhom id-dritt jitkellmu l-ewwel u jistaqsu u jagħmlu domandi, għaliex ħaddieħor irid jitgħallem mingħandhom kif l-aħjar jista’ jgħin.
Hawnhekk ikolli nirrimarka li aktar minn għaxar snin ilu sa 12 jew 13-il sena ilu l-ammont ta’ nies li kienu jaħdmu, kien hemm ir-regoli tax-xogħol illi għal kull 14-il ħaddiem li jkollok trid iddaħħal persuna b’diżabilità, jew b’abbiltajiet differenti.
Biss f’dawn l-aħħar 12-il sena n-numru ta’ ħaddiema li għandhom diżabilità trippla u mill-informazzjoni li għandi għad baqa’ azjendi u employers li jippreferu jħallsu l-multa għax ma jkunux konformi mar-regolamenti tax-xogħol, milli li jimpjegaw persuna b’diżabilità.
Issa fid-dizzjunarju tiegħi l-akbar għajnuna li int tista’ tagħti huwa li, persuna hi min hi, tiftħilha l-bieb biex tkun kapaċi tieqaf fuq saqajha u tkun indipendenti u x’hemm aktar mix-xogħol biex jagħti din id-dinjità sħiħa u biex il-persuna, hi min hi, tħossha ċittadina sħiħa. Mhux biss li qed tieħu mis-soċjetà imma li qed tagħti lis-soċjetà.
U l-aħħar kelma hija dik ejjew fuq dan il-punt nippruvaw nagħmlu sforz ħalli jkollna aktar u aktar bibien miftuħa, fejn ikun hemm bżonn ta’ għajnuniet mod ieħor u għajnuniet speċjali, ma’ dawk li diġà hemm, naraw x’hemm aktar bżonn.
Jien persważa illi nsibu l-koperazzjoni ta’ kulħadd, ta’ kull min ikun imexxi bla distinzjoni bħal ma rajna tul dawn l-aħħar għoxrin sena ġo pajjiżna meta min kellu bżonn dan it-tip ta’ għajnuna biex ikun parti sħiħ minnha, sibnihom u bilmod bdejna nibnu u jien f’dan is-settur inħoss dover qawwi li nsemmi l-kontribut li minn żminijiet oħra għamlet il-knisja biex illum fostna wkoll hemm din il-kuxjenza li din hija responsabbiltà fis-soċjetà tagħna li rridu nerfgħu biċċa minnha lkoll kemm aħna.
Grazzi tal-kontribut tagħkom u nifraħ lil dawk li b’kuraġġ kbir fetħu t-toroq għalihom infushom u b’eżempju għal oħrajn bħalhom.