Ninsab magħkom illum, biex għal sena oħra, nirrikonoxxu l-ħidma li saret mill-iskejjel tagħna permezz tal-għoti tal-Premju għall-Edukazzjoni fl-Iżvilupp Sostenibbli.
Apparti mill-premjazzjoni, illum ingħaqadna lkoll flimkien biex nirrikonoxxu x-xogħol li sar tul din l-aħħar sena minn dawk l-istudenti u l-għalliema fl-iskejjel li ħadmu qatigħ sabiex itejjbu l-prattiċi tagħhom, biex jibdew jidħlu f’rutina li jagħmlu affarijiet sabiex meta jkollna din l-azzjoni ta’ ħafna u ħafna flimkien, meta jingħaqdu, dawn jagħmlu effett.
Il-ġest tal-għoti tal-Bandiera l-Ħadra, il-Green Flag juri li l-iskejjel li ngħataw dan l-unur ħadmu biex jilħqu l-miri ta’ EkoSkola; li nippromowvu sostennibilità fejn jidħol l-ambjent.
Jekk immorru ftit lura fiż-żmien, propju fl-2002, Nature Trust flimkien mal-Fondazzjoni għall-Edukazzjoni Ambjentali, l-FEE, introduċiet għall-ewwel darba dan il-programm fl-iskejjel tagħna.
L-għan aħħari tal-programm kien li aktar tfal jibdew isiru aktar konxji mill-importanza li jinvolvu rwieħhom b’mod attiv billi jsemmgħu leħinhom, juru interess fuq temi varji u jiddibattu ħalli mid-dibattitu ta’ bejnietkom jibdew joħorġu soluzzjonijiet li jtejbu l-ambjenti tal-komunitajiet u tas-soċjeta’ tagħna.
Il-programm EkoSkola jagħti vuċi lit-tfal u s-sehem tal-istudenti fl-EkoSkola jgħin biex jitgħallmu jieħdu deċiżjonijiet sostenibbli, u dan allura, jimxi pass pass mal-għanijiet tan-Nazzjonijiet Uniti fl-Għanijiet ta’ Żvilupp Sostenibbli, li rridu nilħqu sal-2030.
Il-kontribut tal-istudenti permezz tal-EkoSkola mhux biss qed jgħin lis-soċjetà tagħna, iżda wkoll qed jagħmel lil Malta parti minn moviment globali favur ġustizzja ambjentali u sostenibbiltà.
Hu pjaċir li aktar minn 85 fil-mija tal-iskejjel madwar Malta u Għawdex ħadu sehem fil-proġett EkoSkola sa mit-twaqqif tiegħu.
Il-ħidma matul is-sena skolastika mill-Eko Kumitati, li ġieli anke testendi għas-Sajf, hija importanti ħafna biex l-istudenti tagna jirriflettu u jużaw il-ħsieb kritiku biex jaslu għal soluzzjonijiet li jistgħu jintrefgħu billi, biċċa biċċa, ikun hemm għaqda u skop wieħed u kulħadd ikun qed jaħdem għal dak l-iskop.
Permezz tal-programmi mħejjija minn EkoSkola, l-istudenti qed ikollhom ukoll opportunita’ jitkellmu ma’ min jieħu d-deċiżjonijiet, u nemmen bis-sħiħ li, dan jagħti valur miżjud għad-diskussjoni u wkoll ikollkom sehem kif jiġu implimentati u mħabbra ċertu policies.
Sirna ferm aktar konxji dwar l-importanza li nipproteġu dak li għandna. L-isfidi globali li jpoġġu sfida għall-ġenerazzjonijiet futuri irridu nibdew nitrattawhom minn issa, u rridu nibdew nittrattaw minn issa b’mod deċiżiv. Irid ikollna ħsieb sod ħafna li lil dawk li ġejjin warajna se ngħinuhom f’dinja aħjar.
Il-ħidma tagħna bħala pajjiż, iżda, ma tiqafx biss ma’ dawn il-miri. It-tema ta’ żvilupp sostenibbli hi materja li tgħaqqad il-ħsibijiet tal-partijiet li jerfgħu biċċa mit-tmexxija tan-nazzjon fejn tidħol din ir-rokna li nieħdu ħsieb l-ambjenti tagħna.
Tajjeb niftakru li għandek ħafna ambjenti differenti. Għandek mhux biss l-ambjenti naturali, imma wkoll l-ibħra, is-sema’, il-blat u l-ħamrija, l-ispazji miftuħa, fejn int ikollok ukoll ambjent li f’kull lokal hu partikolari għalih.
Anke l-ambjent naturali ivarja bejn lokalità u oħra, u jirrikjedi impenn differenti. Hu sta għall-għalliema, l-iskejjel u l-familji fid-djar, kif ukoll il-Kunsilli Lokali li jibni għarfien ta’ karatteristiċi ambjentali ta’ kull lokal. Għalhekk li din il-kollaborazzjoni bejn il-Kunsilli Lokali u Nature Trust hi sabiħa.
Irridu nibdew billi nieqfu u nħarsu madwarna għax kull lokal għandu l-ambjenti tiegħu, li mhux ambjenti naturali biss, imma wkoll ambjenti soċjali. Dawk huma l-kwalitajiet li flimkien jagħġnu lill-ġens Malti u jagħmluna dak li aħna.
Reċentament, il-Gvern ta’ Malta ħabbar il-Viżjoni 2050, viżjoni li torbot mill-qrib mal-għanijiet tan-Nazzjonijiet Uniti u li tagħti direzzjoni biex pajjiżna juża r-riżorsi tiegħu b’mod innovattiv u sostenibbli.
Barra minn dan, l-impenn konġunt bejn il-Ministeri kkonċernati, partiklarment tal-Edukazzjoni u l-Ambjent, bl-involviment ta’ entitajiet governattivi oħra, qiegħed jiżgura li t-tfal tagħna qed jiġu esposti għal ħafna ideat li għandhom l-iskop li jrendu benefiċċji soċjali b’mod ħolistiku fis-soċjetajiet tagħna.
Il-Kunsilli Lokali wkoll għandhom rwol kruċjali bħala l-ewwel sors ta’ appoġġ ċiviku għaċ-ċittadini tagħna. Għandhom l-irwol li jipproponu u jimplimentaw policies partikolari għall-lokal fejn joperaw, għaliex importanti wkoll li l-ambjent kollu ta pajjiżna għandu fih dawk l-irqajja li huma speċjali għal kull villaġġ u lokal li għandna.
Min-naħa l-oħra, l-attiviżmu u r-rakkomandazzjonijiet ta’ NGOs huma kruċjali biex is-sistema demokratika tagħna tiffunzjona b’mod attiv, ikun hemm il-parteċipazzjoni li mingħajrha u mingħajr spazju biex il-vuċijiet ta’ kulħadd, minn xjuħ bħali sal-iżgħar li qed jipparteċipaw f’din l-attività, m’għandekx vera demokrazija.
Intom it-tfal bżonnjużi ħafna, biex minn ċkunitkom tibdew tiskavaw it-triq biex tkunu ċ-ċittadini ta’ għada.
Programmi bħal EkoSkola huma kruċjali biex it-tfal jifhmu li l-ambjenti ta’ madwarhom huma tagħhom, u huma jridu jiġu fuq quddiem biex jieħdu ħsiebhom l-ewwel. Għaliex aħna l-kbar nistgħu biss inwittu t-toroq biex intom tiġu u tipparteċipaw u tibdew minn issa terfgħu parti mir-responsabbiltajiet li għad ikollkom. Għalhekk li jekk temmnu fikom infuskom u f’pajjiżna, tridu minn issa taraw li kull wieħed u waħda minnkom tikkontribwixxu għall-ġid tal-ħafna, għall-ġid tal-pajjiż kollu kemm hu.
Flimkien, permezz ta l-impenn u tal-kooperazzjoni, nibnu futur sostenibbli u fuq kollox ġust li jixraq lil dawk li għad jirtu d-dinja mingħandna. Għax mhux pajjiżna biss. Meta għandek il-problema tal-bidla fil-klima, li mhux il-pajjiżi kollha, lanqas ċertu pajjiżi kbar, ma daħlu biex jerfgħu parti mill-piż li l-umanità qed tiffaċċja.
Malta, ħafna drabi f’organizzazzjonijiet internazzjonali, kienet vuċi biex issalvagwardjat l-umanità u kienet fuq quddiem, anke intom iż-żgħar tibqgħu tikbru b’din il-kuxjenza li f’kull pass li tagħmlu tridu taraw mhux biss l-impatt fuqkom biss, imma wkoll l-impatt fuq ta’ warajkom u l-impatt ikbar ‘il barra minn xtutna.
Jien għandi fiduċja kbira fikom, u fiduċja wkoll fl-għalliema tagħkom u fidi qawwija li n-Nature Trust, bil-programmi tagħha, qegħda tilħaq lilkom ilkoll.