Iż-żjara tal-lum hija okkażjoni biex il-Presidenza tiltaqa’ mal-uffiċċjali u impjegati tal-Awtorità tal-Artijiet.
L-Awtorità tal-Artijiet għandha rwol ta’ gwardjan u kuratur tal-patrimonju nazzjonali tal-immobbli bini u artijiet u l-proprjetajiet immobbli tal-Gvern li għandhom dejjem jintużaw għall-ġid tal-poplu sabiex il-frott tagħhom jitgawda mill-poplu kollu.
Dan ifisser illi l-iskop ta’ kull konċessjoni jkun biex ikattar il-ġid tal-poplu kollu b’mod u manjiera illi l-aġir tal-Awtorità jkun dejjem imnebbaħ minn skop soċjali, bil-ġid komuni fuq quddiem.
Dan l-iskop soċjali jista’ jkun wieħed fejn iċ-ċittadini u l-familji tagħhom jibbenefikaw direttament, bħal pereżempju meta l-Gvern ta l-opportunità lill-familji biex proprjetajiet immobbli, suġġett għal ċens temporanju, jiġu mifdija u jsiru liberi u franki; b’kundizzjonijiet favorevoli fejn tidħol ir-residenza ordinarja jiġifieri r-residenza primarja ta’ familja.
L-opportunità ta’ fidi qiegħda hemm ukoll għal residenza sekondarja jew ta’ villeġġjatura.
Iżda kif inhu xieraq il-kundizzjonijiet tal-fidi f’dan il-każ huma anqas favorevoli.
L-artijiet tal-Gvern, nippreferi nsejħilhom tal-poplu, qegħdin hemm ukoll biex l-organizzazzjonijiet kulturali u sportivi jiġu mgħejjunin u jkunu ta’ servizz akbar fil-ħajja tal-komunitajiet lokali tagħna, bħal każini tal-baned u l-għaqdiet sportivi diversi.
Il-patrimonju immobbli tal-poplu jintuża wkoll għat-tkabbir ta’ industriji li huma s-sisien tal-ekonomija ta’ pajjiżna.
Minn żmien għal żmien, b’dispjaċir wieħed jinnota illi jfeġġu episodji fejn il-fiduċja tal-poplu fil-ġestjoni tal-patrimonju mmobbli ta’ pajjiżna tixxellef.
Għandi tasal il-weġgħa ta’ ħaddiema dedikati u onesti li jinkeddu bit-tebgħa li tintefgħa, għaliex dawn l-episodji jċajpru r-reputazzjoni kollettiva ta’ l-awtorità.
Huwa importanti mmens illli l-proċeduri ta’ kif isiru l-evalwazzjonijiet ikunu trasparenti, u jidher fil-beraħ li jingħata piż lill-kundizzjonijiet li jwasslu għal deċiżjonijiet fl-aqwa interess tal-poplu tagħna.
Wieħed jinnota b’mod pożittiv l-impenn li ntwera dan l-aħħar mill-Gvern fil-kliem tad-Deputat Prim Ministru u Ministru għall-Affarijiet Barranin u Turiżmu Ian Borg, fejn saru dikjarazzjonijiet li għandu jinġabar dak dovut lill-poplu u tissewwa l-ħsara illi l-poplu jista’ jkun sofra minn ċerta deċiżjonijiet – għaliex huwa neċessarju illi fejn ikunu saru żbalji dawn jissewwew – għaliex il-ġid aħħari tal-poplu jrid ikun il-kejl li jmexxina.
Nagħlaq b’nota ta’ apprezzament u ringrazzjament lill-ħaddiema u l-membri tal-Awtorità tal-Artijiet għax-xogħol tagħhom u nkompli nħeġġeġ sabiex mhux biss jerfgħu b’dedikazzjoni r-responsabbiltà ta’ ġestjoni xierqa mnebbħa mill-aqwa ġid tal-poplu tagħna iżda li wkoll jkunu kburin li din ir-responsabbiltà jwettquha b’impenn, fedeltà u dedikazzjoni.