Il-President Myriam Spiteri Debono żaret il-kumpanija Best Print Ltd. fejn il-proċess tal-istampar tal-pubblikazzjoni ‘Tisjir mill-Qalb’ jinsab fi stadju avvanzat.
Matul iż-żjara, il-President kienet akkumpanjata minn Sina Bugeja, Chairperson tal-Malta Community Chest Fund (MCCF), u uffiċjali tal-Presidenza u tal-MCCF li ħadmu flimkien fuq din il-pubblikazzjoni.
L-edizzjoni ta’ din is-sena tiffoka fuq is-sostenibbiltà fit-tisjir, u r-riċetti huma bbażati fuq it-tradizzjoni Maltija fin-nutrizzjoni, l-użu tal-prodott frisk lokali u n-nuqqas ta’ ħela.
Il-ktieb jinkludi daħla mill-President li fiha tenfasizza l-kunċett li “meta nsajru għall-familja nistgħu nagħmlu għażliet iktar sostenibbli, kemm fix-xiri tal-prodotti kif ukoll fit-tnaqqis tal-ħela, biex b’hekk ikun rispettat ukoll l-ambjent.”
Il-ktieb se jkun qed jinbiegħ fi tmiem il-ġimgħa d-dieħla, matul il-Fiera tal-Ktieb, li se ssir fl-MFCC, Ta’ Qali u jkun disponibbli mill-ħwienet tal-kotba ewlenin madwar Malta u Għawdex.
Il-qligħ kollu mill-bejgħ ta’ ‘Tisjir mill-Qalb’ se jmur għall-iskopijiet ta’ għajnuna li tintalab mill-Malta Community Chest Fund.
